Шикәр куллануны ничек киметергә?

Татлы ризыкларның табигыен сайлагыз. Күнегелгән десерт, печеньелар урынына җиләк-җимеш ашагыз. Алма, банан да тәм буенча алда санап үтелгәннәрдән калышмый, ә файдалары күбрәк. Өстәвенә, аларда организм өчен бик мөһим булган су бар.

Этикеткаларны укыгыз. Шикәр бик күп әзер эшләнмәләрдә – маринадларда, томат соусларында, майонезда, сокларда бар. Шикәрнең тәүлек нормасы 30 граммнан артмаска тиешлеге исегездәме? Мондый микъдардагы шикәр бер стакан эчемлектә генә дә булырга мөмкин.

Баллы эчемлекне көнгә бер тапкыр су белән алыштырыгыз. Организм сусызланганда, кеше арыганлык тоя, таркау була. Татлы газлы су вакытлыча энергияне арттырса да, мондый халәт тиз юкка чыгачак. Иң яхшысы – гади су эчү. Күчеш салмак булсын өчен, суга җиләк-җимеш салыгыз.

Вакланмаган бөртекле ризыклар ашагыз. Аларга шикәр кушылмый, минималь рәвештә генә эшкәртеләләр. Рационыгызга кузаклы үсемлекләр, көрән дөге һәм ясмык кертегез. Составларында клетчатка булу сәбәпле, туклык хисен һәм энергияне озаграк сакларга булыша алар. Бөтен бөртекле ризыклар кандагы глюкозаның кискен үзгәрешен булдырмый.

Ашауны планлаштырыгыз. Менюны алдан төзесәгез, шикәр кушылган ризыклардан баш тартуы җиңелрәк булыр. Өй ризыгы зыянлы фаст-фуд ризыкларын ашау мөмкинлеген киметә.

Йокыгызны туйдырыгыз. Әгәр кеше төнлә ял итеп өлгермәсә, иртәнгегә аның энергиясе булмый. Аны тулыландыруның иң җиңел ысулы – берәр баллы ризык ашау. Тиешенчә йоклагыз һәм сезгә шикәр белән артык мавыгырга туры килмәс.

Чыганак: https://shahrikazan.ru/news/kish-tabyish/shikr-kullanuny-nichek-kimeterg

Фото: ©«Татар-информ»