Татарстанның бер авылында тылсымлы урын бар (РИВАЯТЬ)

Олы Солтанда күпләр тылсымлы урын дип саный торган йорт бар. Аны бер хатынның тиктормас теле аркасында шундыйга әйлән­гән дип сөйлиләр.

Бу хәл бик күптән була. Әлеге йортта бер ир һәм аның көмәнле хатыны яши икән. Бервакыт кышның зәмһәрир суыгында хатынның кура җиләге ашыйсы килгән - бала көткән хатыннар белән дә, «Унике ай» әкиятендә сурәтләнгән үги ана­лар белән дә була торган хәл бу. «Теләсә каян тап, әмма кура җиләге алып кайт, - ди икән хатын. - Мондый хәлемдә кура җиләксез бер көн дә яши алмаячакмын. Кайнатмасы түгел, куагыннан яңа өзеп алынганы кирәк!»

Аңлыйсыздыр инде: кышның бер ае, авыл җире, XVIII, әллә XVII гасыр - ул чорда шәһәр­ләрдә дә супермаркетларның ни икәнен белмиләр әле. Хатын, чиктән тыш хәлдән таеп, эченә ябыша, күзләрен акайта - җәй­ге җиләкне татып карау теләге шулкадәр көчле була инде менә! Сөйләп тә торасы юк: әүвәл заманнан ук ирләр мондый күренешне бик авыр кичерә, сөеклеләренең теләкләрен үтәү өчен ниләр генә эшләми алар!

Һәм, уйламаганда-көтмәгәндә, теге ир ха­тынына әйтә икән: «Беркемгә дә сөйләмәсәң, табып бирәм мин сиңа кура җиләге». Яшь хатын, билгеле, шунда ук бу хак­та авыз да ачмаска дип ант итә. Һәм ир аны базга алып төшә - ә анда очсыз-кырый­сыз кура җиләге куаклары үсеп утыра икән. Моны күргәч, хатын, гадәтенчә: «Хәзер бу җиләк кирәк түгел инде, ананас ашыйсым килә!» - дип әйтмәк­че булса да, тыелып кала, чөнки бу күренеш аны тәмам гаҗәпкә калдыра. Шуңа күрә, җиләк ашап туйгач, биргән сүзен дә онытып, күршесенә кереп китә һәм баздагы хикмәт­ләр турында сөйләп бирә. Шул мизгелдә коточкыч хәл була - көтмәгәндә теге ир үлеп китә. Билгеле, бу бер дә гадел булмый: ха­тынының тиктормас телле булуында ирнең гаебе юк бит!

Тол калгач, теге хатын моннан соң бер­вакытта да авыз ачып сүз әйтмәскә ант итә. Аның сүзендә тору-тормавы хакында солтан­лыларда мәгълүмат юк. Тылсымлы йортның базында кура җиләге үсәме‑юкмы икәнен дә белмиләр. Кемнәрдер үсә, ди, тик кереп карарга куркалар. Ә кайберәүләр үсми, ди, алары да барып караудан шикләнә.

Белмәс­сең, карарсың да, онытылып китеп, бүтән­нәргә сөйләп ташларсың…

http://protatarstan.ru

---
Матбугат.ру