Татарстан сөт җитештерү буенча лидерлар сафында

(Казан, 7 декабрь, "Татар-информ"). Илдә сөт җитештерүне арттыруда лидерлар булып, Татарстан Республикасы, Белгород, Свердловск, Воронеж, Киров һәм Калуга өлкәләре танылды. Тиешле мәгълүмат "Бердәм Россия" рәсми сайтында урнаштырылган.

Быел гыйнвардан октябрь аена кадәр 13,1 млн тонна сөт җитештерелгән, бу узган елгыдан 3,5 процентка артык.

Быелгы җәйдән башлап төбәкләрдә сатып алу бәяләре сөтнең 1 литрына 1,5 - 2 сумга кимеде, дип билгеләп үтте Дәүләт Думасы депутаты һәм аграр мәсьәләләр буенча комитет рәисе урынбасары Айрат Хәйруллин. Базарга читтән кергән коры сөт басым ясый. Нәтиҗәдә, Россиянең коры сөт һәм май җитештерүчеләре продукциягә бәя төшү сәбәпле авыр хәлдә. Гамәлдә, җәен сатып алган сөттән коры сөт һәм май җитештерүчеләр зыянга эшли, дигән сүз.