Саба районы Кызыл Мишә авылында истәлекле вакыйга булды.

Әлеге чарага әфганчының бергә хезмәт иткән иптәшләре кайтты һәм бу вакыйганың сәбәпчеләре дә нәкъ менә алар. Совет гаскәрләренең әфган җирләреннән чыгарылганына быел 36 ел тулды. Ветераннар, еллар үтсә дә, ул вакыттагы авырлыкларны һәм көрәштәшләрен онытмыйлар. Сугышта һәлак булган, аннан исән-сау кайтып тыныч тормышта яшәп вафат булганнарның исемен мәңгеләштерергә тели алар. Әфганчылар республикабызның төрле районнарыннан җыелып кайтканнар иде. Наис Хафизов истәлегенә булган матур чара алга таба Кызыл Мишә авылы клубында дәвам итте. Биредә Әфган сугышы, андагы югалтулар, Наис Фәиз улының утлы далада күргәннәре турында үзе исән вакытта сөйләп калдырган хәтирәләре видеоязмада яңартылды. Кичә барышында җирлек имам-хатыйбы Дамир Мөхәммәтҗанов, җирлек башлыгы Айдар Хаҗиев, геройның тормыш иптәше Гөлфия ханым, балалары, туганнары, әфганчы-ветераннар Наис әфәнде турында үзләренең матур хәтирәләре белән уртаклаштылар. Гөлфия ханымга чәчәкләр бүләк иттеләр. Мәдәният хезмәткәрләре башкаруында патриотик рухтагы җырлар яңгырады. Кичәне карарга килгән тамашачы-авылдашлар да чараны яратып кабул итте. Наис Хафизов һәркем күңелендә яхшылыгы, ярдәмчеллеге, ышанычлы, шаян кеше булуы белән истә. Геройны искә алу чарасы аның каберенә чәчәкләр салу белән тәмамланды.