Россиялеләрнең чиреге дарулар сатып ала алмый

(Казан, 3 июль, «Татар-информ»). Пенсионерлар, инвалидлар, йөкле һәм декрет ялындагы хатын-кызлар - россиялеләрнең 20 проценттан артыгы - үзләренә кирәкле даруларны аларның кыйммәтлеге аркасында ала алмаган. Мондый мәгълүмат РАНХиГСның Социаль анализ һәм фаразлау институты тикшеренүләре барышында алынган, дип яза "Известия".

Әлеге хәл үзебездә җитештерелгән препаратлар җитмәү һәм ташламаларны монетизацияләү белән бәйле, дип саный белгечләр. Күпчелек гражданнар социаль пакет урынына акча сайлаган, бу исә бер дә файдага булмаган.

РАНХиГС мониторингы мәгълүматлары буенча, 2016 елның сентябреннән 2017 елның февраленә кадәр 20 процент россияленең югары бәяләр аркасында кирәкле препаратларын сатып алу мөмкинлеге булмаган. Халыкның тагын 26 проценты мондый вәзгыять белән әлеге вакыт эчендә 1-2 тапкыр очрашкан.