Казанда яшәүче 63 яшьлек хатын-кызның банк картасыннан 133 мең сум акча урлаганнар

(Казан, 19 декабрь, «Татар-информ»). Казанда яшәүче 63 яшьлек хатын-кызның банк картасыннан 133 мең сум акча урлаганнар, дип хәбәр итә ТР буенча Эчке эшләр министрлыгының матбугат хезмәте.

Зыян күргән ханым «Савиново» полиция бүлегендә сөйләгәнчә, аңа телефоннан бер ир-ат шалтыратып, үзен интерактив биржа хезмәткәре дип таныштырган. Ул хатын-кызга акча күчерелүе хакында хәбәр иткән һәм аннан банк картасының мәгълүматларын сораган.

Нәтиҗәдә, пенсионерның счетындагы 133 мең сум акчадан җилләр искән.

Әлеге факт буенча «Мошенниклык» маддәсе буенча җинаять эше кузгатылган.

Полицейскийлар мошенник шалтыраткан номерның Татарстанда теркәлүен ачыклаган.