Казан кызы Альмира озын чәч үстерү серләрен ача

— Әтием кисәргә, буярга рөхсәт итмәде. Аннан соң озын толымлы булу үземә дә ошый башлады. Татар кызларына озын чәч бик килешә бит. Бигрәк тә ике толымга үреп йөрергә яратам, — ди ул.

 

Альмира Казан дәүләт медицина университетында теш табибы белгечлеге буенча белем ала. “Озын чәч табибларга да бик килешә, аларны бизи”, — ди кыз. 

 

 

— Чәчемне гел җыеп йөрим, шулай күнеккәнмен. Йә үрәм, йә “койрык” ясап, кыстырып куям. Берәр чарага барганда таратам. Чәчемне кечкенә чактан ук үстергәннәр. IX сыйныфта 25 cм кискән идем, үкендем. Шуннан елга ике тапкыр очларын гына тигезлим. Көндәлектә хуш исле майлар, кыш көне салкыннан саклый торган спрейлар (“Estel” яки “Olson”) сөртәм. Көзен, язын А, Е, Д витаминнары кергән майлар сылыйм. Аларның файдасы күп. Витаминнар чәчне ныгыта, коелудан саклый, шома һәм ялтырый торган итә. Озын һәм сәламәт чәч үстерергә хыялланучы кызлар фен-плойкаларны еш кулланмасын, — дип киңәш итә Альмира Хәкимуллина.