Явлаштау мәдәният йортында үзешчәннәр концерты үтте

15 ноябрь көнне Явлаштау мәдәният йортында Шекше авыл җирлегенең иҗат коллективлары һәм үзешчәннәр концерты булды. «Хәтер альбомы.Солдат хатлары» фестивале сугыш кырларыннан әйләнеп кайтмаганнарның истәлеген саклауга юнәлдерелгән «Туган җиргә кайтты кайтмаганнар» район фестиваленең бер өлеше булды. Концерт башланыр алдыннан мәдәният йорты фойесында тематик күргәзмә оештырылды. Килүчеләр Алан-Елга авылында туган Кәрим Галимуллинның фронт хатларын һәм бүләкләрен күрделәр. Офицер Фин сугышын уза, аннан Бөек Ватан сугышының беренче көннәрендә үк фронтка китә, Ватан өчен батырларча сугыша һәм фашистларны җиңүгә өч ай кала һәлак була. Үткәндәге истәлекләр янәшәсендә Сәрдә авылында туып-үскән Фәнис Шәрифуллинның фотоматериаллары һәм бүләкләре тәкъдим ителде, ул бүген сугышчы буларак, батырлык һәм кыюлык үрнәге булып, махсус хәрби операциядә катнаша. Шекше авылында туган Илшат Гарипов гармуны да күргәзмәдә аерым урын алды. Яшь солдат 1980 елларда Германиядә армия хезмәте үтә, ике ел буена үзенең музыка коралыннан аерылмый һәм соңыннан аны саклый. Шекше төп гомуми белем бирү мәктәбе укучыларының һәм аларның ата-аналарының Бөек Җиңүнең 80 еллыгына, Ватанны саклаучылар елына багышланган эшләре яшь буынга патриотик тәрбия бирүнең мөһимлеген күрсәтте.

Концерт Шекше төп гомуми белем бирү мәктәбе укытучылары хорының тәэсирле чыгышыннан башланды. Кичәне алып баручы Әмир Хисмәтов фронттан килгән хатларның һәм солдатларның фоторәсемнәренең кыйммәтле булуын искәртте, алар гаиләләрдә кадерләп саклана һәм, геройлар истәлеген саклап, буыннан – буынга тапшырыла. Аннары сәхнәгә яшь артистлар чыкты. Шекше авыл мәдәният йортының «Бөрлегән» үрнәк татар балалар фольклор коллективы «Без сугыш теләмибез» дигән күңелгә үтеп керерлек чыгыш куйды. Ә «Зиләйлек» үзешчән фольклор коллективы тамашачыларны «Фронтка озату» һәм «Бөек Ватан сугышы вакытында урып-җыю газаплары» спектакльләре белән таң калдырды, алар шул катлаулы чорларның рухын якты һәм эмоциональ яктан чагылдырды. Яшь артистлар – Инсаф Гыйләҗетдинов, Индия Галиева, Ильвина Габделхакова, Айзилә Гомәрова, шулай ук «Бөрлегән» үрнәк татар фольклор коллективының өлкән төркеме башкаруындагы музыкаль композицияләр, җырлар һәм биюләр кичәнең якты мизгелләре булды. Урта һәм өлкән буын башкаручылары, җирлек учреждениеләре һәм оешмалары хезмәткәрләре дә үз номерларын тәкъдим итте. Шекше «Акчарлак» балалар бакчасы коллективы әти-әниләре белән «Алые Закаты» бию номеры белән тамашачыларны сөендерде. Шекше авыл җирлеге башлыгы Радик Рамазан улы Хәйретдинов та концертта катнашты, җыр башкарды. Ул махсус хәрби операциядә катнашучы Фәнис Шәрифуллинның әнисе Рәйсә Шәрифуллинага рәхмәт белдерде һәм аңа истәлекле бүләк тапшырды.

Концерт документаль фото һәм видеоматериаллар күрсәтү белән үрелеп барды, алар Хәтер һәм каһарманлык темасын тирәнрәк ачарга ярдәм итте. Программаның финалында Венера Ганиева репертуарыннан концерт катнашучылары башкаруында «Алга» җыры яңгырады. Йомгаклау сүзе белән Саба районы Башкарма комитетының мәдәният бүлеге җитәкчесе Рөстәм Фидаил улы Заһидуллин чыгыш ясады. Ул  фестивальнең әһәмиятен, шулай ук аның кысаларында Ватанны саклаучылар елында уздырыла торган чараларның мөһимлеген һәм үзенчәлеген ассызыклады. Җитәкче Шекше авыл җирлеге коллективларының бердәмлеген билгеләп үтте, «Хәтер альбомы. Солдат хатлары» концертында катнашучыларга һәм оештыручыларга рәхмәт белдерде.