"Эләкмәде" - Салават Фәтхетдинов нәрсәгә үкенә?

автор, 19 сентябрь 2019 - 14:28

1077

«Аллага шөкер, халык кабул итә торган җырлар иҗат иттем»,- дип сөйләде Россия һәм Татарстанның атказанган сәнгать эшлеклесе Ризван Хакимов. Тиздән Казанда композиторның иҗат кичәсе узачак. Ризван Хәким, ТРның халык артисты Салават Фәтхетдинов һәм БР атказанган артисты Ришат Төхвәтуллин журналистлар белән очраштылар.

"Эләкмәде" - Салават Фәтхетдинов нәрсәгә үкенә?

– Иҗатыма килгәндә Аллага шөкер халык кабул итә торган җырлар гына иҗат иттем гомер буена. Мин моның белән бик шатмын. Тамашачыга рәхмәтле мин. Җырларымны халыкка җиткерә торган артистлар бар. Җырларыбыз язылып тора. Ходай бирсә, киләчәктә дә иҗатымны дәвам итәрмен, — дип сәламләде журналистларны композитор.

Ризван Хәкимовның иң беренче җырларының берсе — «Елама, ярсама». Композитор үзенең татар җыр сәнгатендә популярлык яулавын әлеге җыр белән бәйли. Ризван Галимҗан улы бу хитны Куйбышев шәһәрендә армия сафларында хезмәт иткән вакытында иҗат иткән. Хәзер Ризван Хәким — дистәләрчә җыр авторы.

— Ризван абый иҗат иткән җырларның иң яратканым «Көтмә син, көтмә» дип аталганы. Мин аны 20 елдан артык башкардым. Һәр концертны «Аллага шөкер» җыры белән ачтык. Тамашачылар бу җырны башкаруымны сорыйлар, – дип сөйләде Салават Фәтхетдинов.

Татарстанның халык артисты Ризван Хәкимов иҗат иткән берничә җырның аңа «эләкми» калганына үкенүен дә әйтте.

— Ризван абый минем өчен «Агым су» җырын язып бирде. Тормышымда авыр моментлар булганда бу тирән мәгнәле җыр миңа нык ярдәм итте, — дип уртаклашты Ришат Төхвәтуллин.

Башкортстанның атказанган артисты репертуарындагы яңа җырларның берсе дә Ризван Хәким көенә язылган. Ул «Сөю бар әле» дип атала.

5 ноябрьдә Г.Тукай исемендәге Татар дәүләт филармониясе сәхнәсендә Ризван Хәкимовның иҗат кичәсе уздырылачак. Бәйрәмдә композиторның җырларын башкаручы популяр татар һәм башкорт артистрары чыгыш ясаячак.

Айгөл ЮНЫСОВА, Мәгариф

Фото: https://chelny.live