Дмитрий Медведев мәктәптә чиреккә ничә икеле алып укыган?

"Проектория" бөтенроссия ачык дәресендә катнашучы укучылар Медведевтан мәктәптә ничек укыганын сораган. Шуңа җавап итеп, Премьер-министр унынчы сыйныфта икелеләр алуын әйткән. Бу икеле билгесен чиреккә чыгарганнар. Ләкин Дмитрий Медведев билгене соңыннан төзәткән.

"Әлбәттә, минем дә икелеләрем булды. Серне ачам инде, әле беркайчан да сөйләгәнем юк иде. 10 сыйныфта, ул вакытта мәктәптә барысы ун сыйныф иде, бер предметтан (нинди икәнен әйтмим) чиреккә икеле чыкты", - дип сөйләгән Медведев.

"Ләкин иң мөһиме - чирек азагында бөтен көчеңне җыеп һәм дөрес итеп тәмамларга кирәк. Мин мәктәпне тәмамлаганда, минем икеле түгел, өчлем дә булмады - бөтенесен чистартып бетердем", - дигән Премьер.

Дмитрий Медведев фикеренчә, "бишле белән икеле аермасын аңлар өчен, икеле дә булырга тиеш".