Быел районыбызда нинди төзелеш эшләре башкарылачак?

2017 ел Россиядә - Экология, Татарстанда Экология һәм иҗтимагый киңлекләр елы буларак игълан ителде. Шулай итеп, районыбызда Парклар һәм скверлар, аннан соң килгән Су саклау зоналары елы кысаларында Сабинка яр буенда башланган эшләр дәвам иттереләчәк. Сабада чаңгы базасы булдырылачак.

Олы Шыңарда, Килдебәктә, Олы Кибәчедә спорт мәйданчыклары корылачак.

Түбән Симет авылында 50 урынлы клуб, Ике басу Арташта ФАП төзеләчәк. Моннан тыш Ике басу Арташта авыл җирлеге башкарма комитеты административ бинасы төзелешенә дә 4 миллион сум акча бүлү каралган.

Күпфатирлы йортларны ремонтлауга 12,525 миллион сум акча бүленәчәк. Сабада һәм Иләбәрдә -1әр, Шәмәрдәндә 5 йорт төзекләндереләчәк.

Мишәбашта һәм Югары Утарда су челтәре реконструкцияләнәчәк, Сабада күп балалы гаиләләр яшәгән йортларны су белән тәэмин итү өчен 1,3 километр үткәргеч сузылачак.

Ремонт һәм капиталь ремонт эшләре:

Эзмә, Түбән Шытсу һәм Лесхоз балалар бакчаларында, Явлаштау мәдәният йортында, "Тургай" социаль приютында, Югары Утар балалар йорты-интернатында, ветеринария берләшмәсе бинасында башкарылачак.

Торакларны, яшелчә саклау урыннарын төзекләндерү, силос-сенаж траншеялары төзү эшләре дә планлаштырыла. Подрядчылар - "Ак Таш", "ПМК-Мелиорация", ПМК-159", "Мелиорация-Сервис", "Рыбно-Слободский универсалстрой", "Инвестхолдингстрой", "Акварей" җәмгыятьләре, "Таипов" шәхси предприятисе, Саба һәм Шәмәрдән күптармаклы предприятиеләре. Программаларны тормышка ашыру барышында үзгәрешләр дә булырга мөмкин.

Чыганак: saby-rt.ru