Байлар Сабасында «Саба йөзү бассейны» коллективы Сабантуена бирнә җыюны бик күңелле һәм истә калырлык итеп оештырды.

Элекке гореф-гадәтләрне искә төшереп, барлык шартларына туры китереп эшли алар. Менә бирнә җыю күренешен генә алыйк: һәркем милли киемнәрдән, кулда озын колгасы да, йомырка салырга кәрзине дә бар. Гармунчылар дәртле көйләр уйный, барысы да гармунга кушылып җырлыйлар. Дәртле бию, шаян сүз, такмак әйтү - болар берсе дә читтә калмый.

 Бирнә җыерга җигүле аты белән Балтач районы Сосна авылыннан Әмир абый да килгән. Аты да бик тәртипле, чәбәләнми дә. Атны шундый матур итеп киендергәннәр, ә менә каретаны  оста яллап үзлэре ясатканнар. Өйдән - өйгә йөреп, хуҗаларга рәхмәт әйтеп, бик тыйнак-җыйнак, күркәм итеп оештырганнар алар бирнә җыюны.