Авылдан яшьләр кача... Нишлик? Эш хакын күтәрик!

Россия Дәүләт Думасы­ның Икътисадый сәясәт, сә­нәгать, инновацион үсеш һәм эшмәкәрлек комитеты рәисе Сергей Жигарев яшьләр бе­лән очрашуда аларны илнең киләчәге өчен җаваплы ке­шеләр дип бәяләде. Һәрбер кеше илнең үсешенә өлеш кертергә, аның яхшы якка үзгәрергә мөмкинлек биргән кануннар кабул итүдә катнашырга тиеш, дип белдерде. Ул күбрәк яшьләрне тың­лар­га кирәк, аларның Россиядәге бүгенге хәлләрне ничек кү­заллавы, булган мәсьәлә­ләр­не хәл итү юлларын ничек күрүләре кызык, дип әйтте һәм яшьләргә сүз бирде. Студентлар исә артык тел яшереп тормады.

Яшь белгечләр эш эзләп тилмерә, ә предприятиеләр аларны эшкә алырга атлыгып тормый. Бу хакта Татарстан Яшьләр иҗтимагый палатасы әгъзасы, студент хезмәт отрядларының төбәк штабы җитәкчесе Ринат Садыйков сөйләде. "10 мең студент, Татарстанда эшләгән 423 пред­приятиенең җитәкчеләре ара­сында сораштыру уздырылды. Укуын тәмамлаучы­ларның эшсез интегеп йөрү сәбәпләрен җитәкчеләрдән сорадык. Сораштыруда кат­нашучыларның 75 проценты, тәҗрибәләре юк, дип җа­ваплады.

Җитәкчеләрнең бары тик 17 проценты гына яшь белгечләрнең белемнәрен­нән азмы-күпме канәгать. Рес­пондентлар шулай ук яшь­ләрнең артык зур эш хакына өмет итүләрен тискәре яктан бәяли. Бу очракта нишләргә? Яшь белгечләрдә, билгеле, тәҗрибә юк. Әмма аларны азмы-күпме эшкә тартырга кирәк. Әгәр кеше төзүче белгечлеге ала икән, профильле хезмәт отрядларында тәҗри­бә туплау бу мәсьәләне уңай чишәргә мөмкинлек бирер иде. Республикада да, Рос­сиядә дә яшь белгечләрне эшкә урнаштыру юнәлешен­дә дәүләт программасы ки­рәк", - диде Ринат Садыйков. Татарстан Дәү­ләт Советының Икътисад, ин­вестицияләр һәм эшмәкәр­лек комитеты рәисе Рафис Борһанов, уфтанып, совет чорын искә алды. "Яшь белгеч армиягә киткән очракта, аны кире хезмәт урынында көтәбез, дип озаталар иде. Бүген бу юк. Ни­чәмә-ничә тапкыр аны кайтару турында мәсьәләне күтә­рәбез, әмма очына чыкканыбыз юк", - диде ул. Сүз уңаен­нан, яшьләр­дән элеккеге кебек юллама белән эшкә урнашырга теләк бармы, дип кызыксындылар. Ринат Садыйков, сораштыруда катнашу­чы­ларның 32 проценты моңа каршы түгел­леген әйтте. Эшсез интек­кәнче, каядыр барып эшләү хәерлерәк, диде ул.

Очрашуда авылдагы аг­рар тармак турында да сүз каттылар. Татарстанның аг­рар яшьләр берләшмәсе иҗ­тимагый оешмасы рәисе Ми­ләүшә Заһидуллина әйтүен­чә, республикада 2020 елга кадәр авыл яшьләре өчен дәүләт программасы кабул ителгән булса да, хәл ител­мәгән проблемалар кала би­рә. Ул авыл хуҗалыгы тармагында эшләүчеләрнең түбән хезмәт хакы алуын әйтте. "Авыл яшьләренә ярдәм итү дәүләт программасы бары тик Татарстанда гына эшли. Бу - үзенә күрә бер күрсәткеч. Аның берничә максаты бар: яшьләргә файдалы һәм мөһим мәгълүмат белән ярдәм итү, социаль һәм икътисадый җаваплылыкларын арттыру. Сер түгел, авылларда яшьләрне калдыру авыр, шуңа күрә безнең эшчәнлек яшьләрдә авыл хуҗалыгы тармагындагы һөнәрләргә кызыксындыру уятуга да ни­гезләнгән. Моны балалар бакчасыннан ук башладык. Мәсәлән, балаларга мультфильмнар күрсәтелә икән, анда төп каһарманнар - терлек асраучылар, сыер савучылар, агроном һәм зоотехниклар, мал табиблары. Авыл тормышының кызык һәм керемле булуын мәктәп укучыларына һәм югары уку йорты студентларына да сөйләнә. Оста менеджерлар да, икътисадчылар да кирәк", - диде Миләүшә. Ул федераль үзәктә эшләүче депутатлардан "Авыл­да яшәүче яшь бел­гечләрне торак белән тәэмин итү" дәүләт программасына дигән финансларны арттыруны кайгыртуларын сорады. Йорт төзер, алыр өчен, яшьләр еллар дәвамында чират торырга тиеш түгел, диде ул.

Татарстаннан Россия Дәү­ләт Думасына сайланган депутат Ирек Богуславский: "Авылларга икътисадчылар түгел, ә акыллы икътисад ки­рәк. Авыл хуҗалыгы тармагында эшләүчеләргә югары хезмәт хакларын түләүне таләп итәргә кирәк", - дип белдерде.

http://vatantat.ru/