Саба ТВ

Саба районы

16+
Радио һәм телевидение яңалыклары

Агу ашаудан туктыйбызмы?

Ничек кенә булса да зуррак табыш алуга корылган предприятиеләрдә ясалма тәмләткеч, химик катнашмаларсыз гына нинди дә булса азык-төлек җитеш­терелүен төгәл әйтү кыен. Төрле юллар белән кеше организмына эләгүче агулы матдәләр күләме дә артканнан-арта. Ниһаять, һәр­кай­сыбыз­ның сәламәтлегенә зур зыян салучы мондый хәлнең аяныч нәтиҗәләре белән генә көрәшүдән чигенеп, организмыбызны агулаудан туктату чаралары да күрелә башлар, шәт.

 

Һәрхәлдә, шушы көн­нәр­дә Россия Президенты Владимир Путин имзалаган “Ор­ганик продукция җи­теш­терү” турындагы 2020 елның 1 гыйнварыннан кө­ченә ке­рүче яңа Закон нәкъ менә шул максатны күздә тота.


Әйтергә кирәк, Татарстанда бу юнәлештә эшләр күптән башланып киткән иде. Бездә инде “органик җи­теш­терү таләпләре”нә туры ки­лүче предприятие һәм хуҗалыклар саны да ел саен арта тора. Органик продук­циянең бәясе дә югары, файдасы да күбрәк, диләр 25 гектар мәйданда кура җи­ләге, карлыган һәм каен җиләге җитештереп, Мәскәү кулланучыларын шатландыручы “Андрюшкино” хуҗа­лыгын­да. Быел яз алар икенче дәрә­җә сертификатка ия булган, хәзер исә барлык таләпләрне үтәргә җыена­лар.


Дөрес, беренче дәрә­җәле ак сертификат алу өчен хуҗалыкка әле шактый тырышасы бар. Моның өчен туфракны бары тик органик ашламалар белән генә эш­кәртү, табигать бә­ла-казала­рыннан, корткычлардан саклау өчен биологик һәм химик матдә­ләрдән тулысынча баш тартырга кирәк икән. Җитештерү пред­­приятие­ләренә дә ясалма тәмләт­кечләр, химик катнашмалар һәм агулы мат­дәләр куллану тыела.


– Органик продукция җи­тештерү җиңелләрдән түгел. Закон таләпләренә тулысынча җавап бирү өчен предприятие һәм ху­җалыкларга шактый эшләр башкару кирәк булачак, – ди Татар­стан­ның органик продук­цияләр җитеш­терү советы җитәкчесе Валерий Гогин.


Татарстан Авыл ху­җа­лыгы һәм азык-төлек министрлыгы каршында тө­зелгән Җәмәгать советы соңгы елларда бу юнәлештә эш­ләүче хуҗалыкларны барлап кына калмыйча, төр­ле ярдәм дә күрсәтә. Нә­тиҗәсе дә бар. Әмма, бу юнә­лештә махсус закон барлыкка килгәч, эшләр тагын да җанлана төшәр, шәт.

 

Реклама


Тормыш дәрәҗәсе кү­тәрелә барган саен кеше­нең үзе кулланган ризыкка игътибары арта. Бүген “Органик продукция җитеш­терү” турындагы закон дөнья­ның 80нән артык илендә кабул ителгән. Мондый продук­ция­гә карата таләпләр дә арт­каннан-арта. Димәк, андый про­дукциянең бәясе дә чагыштырмача югары булачак, дип фаразларга кирәк. Кибет киштәсендәге азык-төлек бәяләре болай да әледән-әле артып торган бер вакытта, күбрәк табыш алырга теләүчеләр моменттан файдаланып калырга омтылмасмы?


Россия Дәүләт Думасы җитәкчесе Вячеслав Володин әйтүенчә, органик про­дукцияләр махсус бил­ге­ләмә аша бердәм дәүләт реестрына теркәләчәк. Сертификат алу өчен һәр предприятие, хуҗалыкка шактый катлаулы таләпләрне үтәргә туры килә. Бу исә үз чиратында ясалма продукция җитеш­тереп, түбән сыйфатлы продукциясен югары бәядән сатучы намуссыз эшмәкәр­ләр­нең нә­фесен авызлыкларга мөм­кинлек бирәчәк, дип ышандыра Дәүдума спикеры.


Яңа закон органик продукция җитештерүчеләр алдына 11 төрле таләп куя. Әйтик, андый продукция органик булмаганнар белән бергә җитештерелергә, сак­ланырга һәм хәтта бер транспортта күчерелергә дә тиеш түгел. Үстергәндә пестицид, гербицид кебек агулы ашламалар, гормональ препаратлар, агрохимикатлар, антибиотик яки тиз өлгертүче стимуляторлар куллану катгый тыела. Закон кагыйдә­ләрен бозучыларны административ җавап­лылыкка тарту яки зур кү­ләм­дә штраф салу карала.


Белгечләр әйтүенчә, без­дә органик продукция җи­тештерү өчен бөтен шартлар бар. Аеруча, авыл җи­рендәге органик продукция җитеш­терү өчен шәхси һәм фермер хуҗа­лыкла­рының мөмкин­лек­ләре зур. Россия Премь­ер-министры Дмитрий Медведев та Җир шарында җи­тештерелә торган органик продукциянең – 10, ба­зар­дагысының 25 про­центы безнеке булыр, дип фаразлый.

Фото: http://www.vatantat.ru
 

Камил Сәгъдәтшин

http://www.vatantat.ru

Следите за самым важным и интересным в Telegram-каналеТатмедиа

 

 

Безнең Вконтаке челтәренә языл! 

Кызыклы яңалыкларны күзәтеп бару өчен Телеграм каналга язылыгыз

 

 

 

Реклама

Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев