30 сентябрьдә яңа территорияләрнең Россия составына керүе турындагы килешү имзаланачак

автор, 29 сентябрь 2022 - 14:19

712

Владимир Путин җомга көнне яңа территорияләрнең – Донецк һәм Луганск халык республикаларының, шулай ук Херсон һәм Запорожье өлкәләренең Россия составына керүе турындагы килешүләрне имзалау тантанасында катнашачак, дип белдерде президентның матбугат секретаре Дмитрий Песков. Бу турыда «РИА Новости» хәбәр итә.

30 сентябрьдә яңа территорияләрнең Россия составына керүе турындагы килешү имзаланачак

«Иртәгә Зур Кремль сараенда, Георгий залында, 15:00 сәгатьтә РФ составына яңа территорияләрнең керүе турында килешүләрне имзалау тантанасы булачак. Бу чарада президент Путинның зур чыгышы булачак», – диде Песков.

Ул билгеләп үткәнчә, бу президентның Федераль Җыенга юлламасыннан аермалы формат булачак. Юллама үзе соңрак булачак, аның датасы турында алдан хәбәр ителәчәк.

Россия составына керү турындагы мәсьәлә буенча референдумнар 23-27 сентябрьдә Донецк һәм Луганск халык республикаларында, шулай ук Херсон һәм Запорожье өлкәләрендә узды. Бюллетеньнәрнең 100 процентын эшкәртү нәтиҗәләре буенча ДНРда тавыш бирүчеләрнең 99,23 проценты, ЛНРда – 98,42 процент, Херсон өлкәсендә – 87,05 процент, Запорожье өлкәсендә – 93,11 проценты Россия составына керү өчен тавыш биргән.