30 март көнне Ике басу Арташ авылында Нәүрүз бәйрәме гөрләде.
Нәүрүз - мөселман халыклары бәйрәме, кешелек тарихында иң борынгы бәйрәмнәрнең берсе. Ул кышның тәмамлануын һәм яз килүен, тереклекнең яңаруын, җирне чәчүгә әзерли башлауны символлаштыра. Бәйрәмне авыл китапханәсе белән берлектә мәдәният хезмәткәрләре оештырды.
Чара мәдәният йорты каршындагы бизәлгән мәйданда узды, анда иртә таңнан музыка яңгырап торды, халыкны Нәүрүз тантанасына дәште. Бәйрәмне карарга бик күп кеше килде. Алар сәхнәләштерелгән тамаша карадылар, Нәүрүзбикә белән очраштылар. Балалар шигырьләр укыды. Тамаша борынгы һәм хәрәкәтле уеннар, җыр-биюләр белән дәвам итте. Алга таба бәйрәмчә табын әзерләнде, үзбәк казанында ике төрле ярмадан тәмле ботка, табаларда кайнар коймаклар пеште. Килгән кунаклар барысы да шушы ризыклардан авыз итте. Уеннарда һәм ярышларда катнашучыларның барысына да бүләкләр, ә балаларга тәм-томнар тапшырылды. Бәйрәмне оештыруда ярдәм иткән Нырты хуҗалыгы җитәкчесе Ильяс Дәүләтгәрәевка, авылдашларыбыз Нәкыя һәм Сәлимҗан Кәримовларга олы рәхмәтебезне җиткерәбез, дип хәбәр итә Ике басу Арташ мәдәният йорты җитәкчесе Раилә Мөхәммәтҗанова. Әлеге чара турында үзләренең җылы фикерләрен авыл халкы да белдерә. Нәүрүз бәйрәмен матур итеп оештырган, халыкка күңелле бәйрәм бүләк иткән өчен мәдәният йорты һәм китапханә хезмәткәрләренә зур рәхмәт, алга таба да сәламәт булып, авылыбызда күңелле чаралар үткәрергә язсын аларга диләр.
Следите за самым важным и интересным в Telegram-каналеТатмедиа
Нет комментариев