22нче апрельдән Татарстанда, шул исәптән Саба районында да янгынга каршы махсус режим кертелә.

автор, 25 апрель 2024 - 14:45

372

Бу хакта Саба һәм Теләче районнары буенча янгын күзәтчелеге бүлеге җитәкчесе Айнур Галимуллин хәбәр итә.

“Янгынга каршы махсус режим турындагы карарны республика премьер-министры Алексей Песошин имзалаган. 2024 елның 22 нче апреленнән 12 нче маена кадәр Татарстан Республикасы территориясендә янгынга каршы махсус режим урнаштырырга, диелә документта”, - ди Айнур Галимуллин.

Әлбәттә, янгыннарга – хәвеф-хәтәргә юл куймау барыбызның да гражданлык бурычы.

Янгынга каршы махсус режим гамәлдә булган чорда район территориясендә учаклар ягу, көнкүреш калдыкларын, коры үлән һәм чүп-чар яндыру тыелачак. Шулай ук мангалларда һәм янмый торган башка савытларда, урман янгыннары куркынычы янаган торак пунктларда, бакчачылык ширкәтләрендә яки балалар лагерьларында ризык кыздырырга ярамый. Җәмәгать туклануы объектлары гына искәрмә булып тора.

“Янгынга каршы режим вакытында кагыйдәләрне үтәмәүчеләргә административ штраф салыначак. Гражданнарга – 10 меңнән 20 мең сумга, вазыйфаи затларга – 30 меңнән 60 мең сумга, юридик затларга 400 меңнән 800 мең сумга кадәр булачак”, - дип хәбәр итә Айнур Галимуллин.