Законсыз әйләнмә, алкоголь

автор, 24 июль 2019 - 10:43

589

Соңгы елларда суррогат спиртлы эчемлекләр сату проблемасы шактый кискен тора. Июнь аенда Татарстан Республикасы Дәүләт алкоголь инспекциясенең Арча территориаль органы белгечләре үткәргән административ тикшерү кысаларында районда законсыз аракы сатуның 3 очрагы билгеле булды.

Түбән Камадан килгән шәхси эшмәкәр 23 июньдә минераль судан бушаган 0,5 литрлы пластик шешәдә спиртлы эчемлек сатканда тоткарланды. Аннан 5 литрлы канистрга салынган спиртлы сыекча алынды. Закон бозучыга Административ хокук бозулар турындагы Россия Федерациясе кодексы нигезендә беркетмә төзелде. Шулай ук шәхси эшмәкәр Л.да сатуга 0,5 литрлы шешәдә спирт исе килеп торган продукцияне 400 сумга сатуга куйган иде. Казаннан килгән гражданка Х. исә шундый ук спиртлы шешәне 350 сумга сатканда тоткарланды. Моннан тыш алкоголь продукциясе сатуның аерым таләпләрен үтәмичә 0,45 литрлы шешәдә сыра белән сәүдә итүче дә административ җаваплылыкка тартылды.

Законсыз рәвештәге ялган аракы сатучыларны фаш итүдә халык та актив катнаша ала. Татарстанның “Халык контроле” системасына теркәлеп, легаль булмаган һәм контрафактлы исерткеч эчемлекләр сатылу очраклары хакында хәбәр итүчеләрне (фактны раслаган фото булуы шарт) акчалата бүләкләү мөмкинлеге каралган.