Саба ТВ

Татарстанда супер-бабай оныгына “МТЗ-82”нең кечкенәсен ясап халыкны таң калдырган [+фото]

Балтач районы Кенәбаш авылында яшәүче Ринат Ибәтуллинны белгән кешеләр аның тимер-томыр эшенә осталыгына, әллә ниләр уйлап табуына шакката.

Тапкыр булганы өчен мәктәптә укыганда ук "Архимед Ринат" дип кушамат такканнар һәм бүгенгә кадәр аны нәкъ шулай атыйлар икән. Ринат абый моңа үпкәләми, "начар кушамат түгел бугай" дип көлә.
Бу арада Ринат абый авылдашларын уйлап табучанлыгы белән тагын таң калдырган. 2 яшьлек оныгы Тимерханның туган көненә "МТЗ-82" тракторының кечкенә вариантын ясаган.
- Мин - бик бәхетле бабай, ике оныгым бар, тиздән өченчесе туачак, - дип сөйләде Ринат абый. - Тракторны үземнең һәм оныгым Тимерханның гәүдә пропорцияләрен исәпкә алып ясадым, ягъни ул миннән никадәр кечкенә булса, мини-трактор да "МТЗ-82"дән шулкадәр бәләкәйрәк. Тракторда йөрүемне күреп, Тимерхан да кызыга иде. Менә хәзер үзенеке бар (көлә). Әлегә ул йөрми, двигателе юк. Оныгым кечкенә бит, берәр елдан электр двигателе куячакмын, Алла боерса. Күрше малайлары кереп: "Ринат абый, әйләнеп килик әле", - дип тракторны сорыйлар. Берсе утыра, икенчесе этеп бара, мәш киләләр. Аның руле, тормозы бар. "Жигули"ның приборлар панелен урнаштырдым. Арткы тәгәрмәче - "Нива"ныкы, алгысына кул арбасыныкын куйдым.

Рәзилә РӘСИМ
Ирек мәйданы

 

______________________________________________________________________________________________________________________________________

 

Безнең инстаграммга кушыл ===>>> Instagram.com/trksabadulkynnary/

______________________________________________________________________________________________________________________________________

 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: