Салават Фәтхетдиновның “Инстаграм” битен кем алып баруы билгеле булды

Татарстанның халык артисты Салават Фәтхетдиновның "Инстаграм" битендә 88 меңгә якын язылучы бар. Мэтр беренче фотосын 2017 елның 16 гыйнварында элгән.

Җырчы шәхси битен үзе алып барамы яки ярдәмчеләре эшлиме? Бу сорауга ул "Татар-информ"га җавап бирде.

- "Инстаграм" битен үзем алып барам. Җитешмәгән вакытта Рөстәмгә кушам. Улым алып бара. Минем белән бергә йөрүче ярдәмчем бар, ул да булыша. Без гастрольдә вакытта, Казанда бер ярдәмчем кала. Кайвакытта алар миңа җибәрәләр мәгълүматны. Болай, башлыча үзем алып барам.

Менә кичә "Форсаж"га бардык. Автоспорт буенча ике Россия чемпионы Айдар Нуриев белән Рөстәм Фәтхетдинов тренировка ясады. Үзе бер кызык әйбер булып чыкты. Шуны үз битемә элеп куйдым.

"Инстаграм"га теләсә нәрсә элеп, кешенең башын катырасым килми. Гаиләгә, сәнгатькә, милләткә кагылышлы әйберләр генә куям. Чүп-чар белән кешенең башын катырмаска тырышам", - диде Салават Фәтхетдинов.

http://intertat.tatar