Сабада шашлык аркасында низаг чыгып, бер егетне пычак белән кадап үтергәннәр

(Казан, 9 ноябрь, «Татар-информ»). Сабаның Олы Арташ авылында бер егетне пычак кадап үтергәннәр.

4 ноябрь көнне ике ир-ат башта утын ярган, аннары шашлык кыздырып, спиртлы эчемлекләр белән бәйрәм итәргә уйлаган. Итне җебетергә куйганнар, ул арада берсе эш буенча чыгып киткән, кайтса, әле шашлык кыздырылмаганын күргән. Шуның аркасында тавыш чыккан. Ачуыннан йорт хуҗасы иптәшенә пычак белән кадап, үзе йокларга кереп киткән. Алган җәрәхәтләреннән егет шунда ук үлгән.

Үлгән егетнең әти-әнисе уллары озак кайтмаганга борчыла башлый. Туганнары барып, егетнең үле гәүдәсенә тап була.

Россия Тикшерү комитетының Татарстан буенча тикшерү идарәсе җитәкчесенең өлкән ярдәмчесе Андрей Шептицкий хәбәр итүенчә, «Үтерү» маддәсе буенча җинаять эше ачылган. Кулга алынган ир-ат гаебен таныган, хәзер ул сак астында. Җинаять эшен тикшерү дәвам итә.