Роспотребнадзор: Татарстанда 20 проценттан артык кешенең коронавируска иммунитеты бар

(Казан, 18 август, «Татар-информ»). Татарстанда 20 проценттан артык кешенең яңа төрдәге Covid-19 коронавирус инфекциясенә иммунитеты бар. Бу хакта РИА Новости агентлыгы Роспотребнадзорның матбугат хезмәтенә сылтама белән хәбәр итә.

Ведомство россиялеләрнең коронавируска популяцион иммунитетын бәяли. Илнең 23 төбәгендә 65 меңнән артык тест үткәргәннәр, тагын өч төбәктә тикшеренү төгәлләнеп килә. Аларның һәркайсында 2,8-3,2 мең кешене тикшергәннәр.

Татарстанлылардан тыш, Мәскәү шәһәре һәм өлкәсе, Санкт-Петербург шәһәре, Әстерхан, Ленинград һәм Төмән өлкәләрендә яшәүчеләрдә иң югары популяцион иммунитет булуы ачыкланган.

Фото: https://pixabay.com/images/id-5412664/