Республикабызда «Бердәм Россия» проекты кысаларында “Герой әтисе” фотокүргәзмәсе эшли.

Күргәзмә махсус хәрби операция зонасында батырлык күрсәтеп, дәүләт бүләгенә лаек булган һәм яу кырында башын салган герой егетләргә, аларның әтиләренә багышлана. Фотосурәтләрдә кулларына күкрәкләрен орден-медальләр бизәгән батыр уллары фотосурәтләрен, бүләкләрен, шәхси әйберләрен тоткан әтиләре. Сурәтләр астына хәрбиләрнең батырлыклары һәм тормышлары турында мәгълүматлар тупланган. Күргәзмәдә Татарстанның 30 районыннан 45 портрет тәкъдим ителгән. Алар арасында дүрт Россия Героеның әтисе бар. Биредә шулай ук 32 батырлык ордены кавалерының әти-әниләре турында сөйләнә.Районыбыздан әлеге күргәзмәдә үзенең улы Айсафның портретын тотып төшкән Айдар Галиевның фотосурәте дә урнаштырылган. Өстәмә рәвештә тагын 6 герой әтисе булган райондашларыбызның фотосурәтләре дә биредә үзләренең мактаулы урынын алып тора. Бүгенге чарада вафатыннан соң “Батырлык ордены” белән Ленар Юнысовны бүләкләделәр. Әлеге орденны аның тормыш иптәше Ләйсәнгә тапшырдылар. Шулай ук “Батырлык ордены белән Донецк халык Республикасының Ясиноват районы Мариновка торак пунктында махсус хәрби операция барышында батырларча һәлак булган Илфат Галимҗанов та бүләкләнде. Әлеге кадерле бүләкне аның әти-әнисе кабул итеп алды. Күргәзмә ачылышында Зөлхәбирә Әхмәтшинага полк командиры тарафыннан рәхмәт хаты тапшырлды. Зөлхәбирә апаның улы Инсаф та махсус хәрби операциядә үзенең хәрби бурычын үти.
«Бердәм Россия» проекты кысаларында район Мәдәният йортында «Герой әтисе» фотокүргәзмәсе 1 апрельдән 7 апрельгә кадәр Байлар Сабасында, 8 апрельдән 14нә кадәр Шәмәрдән мәдәният йортында эшлиячәк. Керү ирекле.