Киномеханик белән очрашу
Шекше мәдәният йортында авылдашыбыз, хәзер Ульяновск шәһәрендә яшәүче Рафинад Рәис улы Сәйфуллин булды.Форсаттан файдаланып, балалар өчен аның белән очрашу-әңгәмә оештырдык һәм әлеге чараны "Авыл киносы серләре"дип атадык. Рафинад абый авыл халкын "кино" сәнгате белән таныштыручыларның берсе. Ул 1972-1976 елларда Шекше мәдәният йортында киномеханик булып эшләгән.
Егет 70нче еллар башында Саба район үзәгендә курслар тәмамлый һәм туган авылына 3нче категорияле белгеч булып кайта, тәҗрибә туплагач, үз эшенең чын остасына әверелә. Ул елларда Шекше, Алан-Елга һәм Сәрдә авыллары халкы Шекше мәдәният йортында кино сеансларын түземсезлек белән көтеп ала, һинд фильмнары аеруча популяр була. Рафинад Сәйфуллин радиотехника белән дә мавыга, авылдагы нокталы радио аша пластинкадан җырлар трансляцияли һәм булачак фильмнар турында белдерүләр җиткерә.
Балалар бик теләп кунакның киномеханик һөнәре нечкәлекләре турында сөйләвен тыңладылар, сораулар бирделәр. Рафинад Рәис улының Шекше мәдәният йортына алып кайткан бәһасез бүләге – кино күрсәтү җайланмасы белән бик кызыксынып таныштылар. Ул әле дә яраткан эше белән шөгыльләнә. Ул шулай ук үз куллары белән "Рафтор" мини-тракторын да ясаган.
Ләйсән Хисмәтова.
Следите за самым важным и интересным в Telegram-каналеТатмедиа
Нет комментариев