Австралиядә хулиганнар кибеттәге җиләк-җимешләргә энә кадап калдырган. Соңгы көннәрдә куркыныч табылдык грушаларда булуы ачыкланган. Бу турыда «Вести» каналы хәбәр итте.
Бер хатын кибеттә сатып алган груша эчендә тегү машинасы энәсен тапкан. Бәхеткә, бу хатынга зыян килмәгән.
«Мин грушаны тешләдем һәм энә күреп алдым. Мин шаккаттым. Энәнең ни белән зарарланган булганын кем белгән», — дип сөйләгән ул.
Хатын грушаны кибеткә кире илтеп биргән. Супермаркет вәкилләре тикшерү башлаган.
Австралия һәм Яңа Зеландия кибетләрендә энәле җимешләр сентябрь азагында барлыкка килгән. Ул вакытта мәктәптә укучы баланы тоткарлаганнар. Бала энәләрне шаяртып кадавын әйткән.
Октябрьдә исә шундый ук хулиганлык өчен 50 яшьлек хатынны тоткарлаганнар. Ул шулай итеп хезмәттәшләреннән һәм җитәкчелектән үч алмакчы булган, диелгән әлеге хәбәрдә.
Фото: "Татар-информ"
Нет комментариев