Казан халкы тоннадан артык чыршыны кәҗәләргә азыкка тапшырган

Казан халкы тоннадан артык чыршыны кәҗәләргә азыкка тапшырган. Бу хакта Идел буе экология компаниясенең матбугат хезмәте хәбәр итә.

Быел Татарстанда чыршы тапшыру буенча ике кабул итү пункты эшли башлады. Аның берсе Гадел Кутуй урамында, икенчесе - сәүдә нокталарының берсендә урнашкан.

Барлык җыелган чыршылар Биектау районындагы Шеланга авылына Морат Сираҗин фермер хуҗалыгына тапшырылган.

Кышын йорт хайваннары яшел азыктан мәхрүм. Шунлыктан кәҗәләргә чыршылар бик урынлы булып чыкты, дип җиткергән Сираҗин. Кәҗәләр аның энәләрен дә, кайрысын да ашый. Фермер калган өлешен ваклап, он ясый. Он исә витамин буларак тавык, каз, үрдәкләр ризыгына кушыла.

Фото: Михаил Захаров

http://tatar-inform.tatar