Изоляцияләнү режимында өйдән белешмәсез чыккан өчен яңа маддә нигезендә штраф салына

Татарстанда үз-үзеңне изоляцияләү режимында өйдән рөхсәт белешмәсеннән башка чыккан өчен яңа маддә буенча штрафка тарта башлаганнар.

1 апрельдә РФ Административ кодексының «Гадәттән тыш хәл яки аның барлыкка килү куркынычы вакытында үз-үзеңне тоту кагыйдәләрен үтәмәү турында»гы яңа маддәсе үз көченә керде. Аның буенча үз-үзеңне изоляцияләү режимын бозган өчен кисәтү яки бер меңнән алып утыз мең сумга кадәр штраф каралган. 

Вазифаи зат шундый хокук бозган өчен 10 меңнән 50 мең сумга кадәр, юридик зат 300 меңнән ярты миллион сумга кадәр штраф түләячәк.

Агентлыкка мәгълүм булганча, Эчке эшләрнең барлык территориаль бүлекләрендә үз-үзеңне изоляцияләү режимын бозган өчен җәза бирү хокукына ия 12 ведомство вәкилләре кергән эшче төркемнәр бар.

Полиция хезмәткәрләре кешене урамда туктата, әгәр аның законсыз йөрүе ачыклана икән, аңа материал төзелә, аннары ул эш төркеменә тапшырыла. Анда инде административ хокук бозу турында беркетмә төзелә.

Элегрәк мәгълүмат чараларында Татарстан Югары суды, янәсе, республика район судларына иске маддә буенча язылган штрафларны гамәлдән чыгарырга дигән хәбәр булды. Матбугат хезмәтендә хәбәр итүләренчә, Татарстан Югары суды мондый күрсәтмәләр бирергә вәкаләтле түгел, ул эшләрне шикаять бирү стадиясендә карый. 
 

Фото:Фәнил Мәүлетов / saby-rt.ru