ЮХИДИ хезмәткәрләренә тәмәке тартуны, машина йөртүчеләр белән дорфа сөйләшүне тыярга кирәк. Россия Эчке эшләр министрлыгының халыкның юл кагыйдәләрен үтәвенә күзәтчелек буенча административ регламентына шундый төзәтмә әзерләнгән.
"Машина йөртүчеләр белән аралашканда, ЮХИДИ хезмәткәре ягымлы, төгәл булырга, әңгәмәдәшенә "сез" дип эндәшергә, үз таләпләре белән кисәтүләрен аермачык аңлашырлык итеп җиткерә белергә тиеш", - диелә документта. Шуңа өстәп әле ул "җенес, яшь, раса, милләт, тел, социаль, милек яки гаилә хәле, сәяси яки дини карашлар буенча кешене дискриминацияләү"дән дә сакланырга тиеш. "Әгәр машина йөртүче ЮХИДИ хезмәткәрен закон бозуга өндәсә, мисал өчен, ришвәт бирсә, инспектор бу хакта җитәкчелеккә хәбәр итәргә тиеш", - диелә шул ук документта.
Регламентка әзерләнгән үзгәрешләрнең бер өлеше машина йөртүчеләрне алкогольле эчемлек эчү яки наркотик куллануга тикшерү мәсьәләсенә кагыла. Яңа кагыйдәләр нигезендә, табиблар "тимер ат" хуҗасы хәмер белән наркотик матдәләр кулланмаган дип нәтиҗә ясаса, ЮХИДИ инспекторы аны медицина оешмасыннан машинасы янына кадәр илтеп куярга тиеш булачак. Документта шулай ук, кич белән инспекторның кулындагы жезлда яктырткыч элементлар да булырга тиеш, диелә. ЮХИДИ хезмәткәрләре хәзер машиналарны постта тормаган вакытта да туктата алачак. Мәгълүм булганча, әлеге административ регламент быелның апрелендә үк гамәлгә керергә тиеш иде. Тик Эчке эшләр министрлыгы аңа төзәтмәләр кертергә кирәклеген искәртеп, бу эшне кичектереп торды. Әлеге документның кайчан гамәлгә керүе аны башка федераль органнар белән килештерү эшенең күпмегә сузылуына бәйле.
______________________________________________________________________________________________________________________________________
Безнең инстаграммга кушыл ===>>> Instagram.com/trksabadulkynnary/
______________________________________________________________________________________________________________________________________
Иң мөһим һәм кызыклы язмаларны Татмедиа Telegram-каналында укыгыз
