Март ае нинди булачак?

(Казан, 1 март, "Татар-информ"). Март - язның беренче ае булса да, шартлы рәвештә ул әле кыш фасылы буларак карала. Чөнки кар катламының эрүен апрель башы һәм урталарында гына күзәтәбез. Россия Гидрометеорология үзәге директоры Роман Вильфанд "Российска газета"га март аена булган фаразларны җиткергән.

"Һава температурасының тәүлек дәвамында 0дән югарырак күтәрелүен март азагында гына көтәргә кирәк. Мәскәү зонасында, һәрхәлдә, шулай булачак. Елгалар боздан апрель башында ачыла, кара каргалар март азагына әйләнеп кайта. Чын яз 23 мартта башлана, - дигән ул.

Роман Вильфанд сүзләренчә, айның беренче ункөнлегенә фараз кылып карасак, Татарстанда һава температурасы нормадан 6-8 градуска җылырак булачак икән. Шулай да ул әле 0дән түбән - 2-4 градус чамасы салкын булачак, ди.