Гинцбург: Назаль вакцинадан соң коронавируска иммунитет ярты ел сакланырга мөмкин

(Казан, 25 ноябрь, «Татар-информ»). Коронавируска каршы назаль препарат куллануның нәтиҗәсе ким дигәндә ярты ел сакланыр дип көтелә. Бу хакта «Интерфакс» агентлыгы хәбәр итә.

«Стериль иммунитет ярты елдан артык сакланыр дип өметләнәбез, әмма клиник сынаулар үткәрелми торып, моны төгәл әйтеп булмый», - диде Н.Ф.Гамалея исемендәге үзәк җитәкчесе Александр Гинцбург.

Аның сүзләренчә, мондый препарат белән прививка ясау «тагын бер өстәмә саклану системасы» булдырырга мөмкинлек бирәчәк.

«Татар-информ» агентлыгы әлеге препаратны тикшерергә ниятләүләре хакында элегрәк хәбәр иткән иде. Аны күптән түгел Россия Президенты Владимир Путин да ясатты.